अकोला दिव्य न्यूज नेटवर्क : बहुचर्चित किसनराव हुंडीवाले हत्या प्रकरणात जन्मठेपेची शिक्षा ठोठावण्यात आलेल्या आरोपी प्रतीक दयाराम तोंडेला मुंबई उच्च न्यायालयाच्या नागपूर खंडपीठाने दणका दिला आहे. आरोपीने जन्मठेपेची शिक्षा स्थगित करण्यासाठी तसेच जामीन मिळवण्यासाठी दाखल केलेला अर्ज न्यायमूर्ती उर्मिला जोशी-फाळके व न्यायमूर्ती निवेदिता पी.मेहता यांच्या खंडपीठाने फेटाळून लावला. त्यामुळे आरोपीची शिक्षा कायम आहे.
या प्रकरणातील आरोपी प्रतीक तोंडे याला कनिष्क न्यायालयाने भारतीय दंड संहितेच्या कलम १४३ (बेकायदेशीर जमाव), १४७ (दंगल), ३०२ (खून) सह कलम १४९ (समान हेतू) व सार्वजनिक मालमतेचे नुकसान प्रतिबंधक कायद्यांतर्गत दोषी ठरवले होते. या गुन्ह्यासाठी त्याला जन्मठेप आणि ५ हजार रुपये दंडाची शिक्षा ठोठावण्यात आली होती. या शिक्षेच्या विरोधात उच्च न्यायालयात त्याने अपील दाखल केले होते. मुख्य अपील प्रलंबित असेपर्यंत शिक्षा स्थगित करून जामीन मिळावा, असा विनंती अर्ज केला होता.
सुनावणीदरम्यान सरकारी पक्षाने न्यायालयात सांगितले की, घटनेच्या वेळी इतर आरोपी मृतक (किसनराव हुंडीवाले) यांच्यावर प्राणघातक हल्ला करत होते. त्याच वेळी प्रतीक तोडे याने फिर्यादी प्रवीण हुंडीवाले याला घट्ट पकडून ठेवले होते, जेणेकरून आपल्या वडिलांना वाचवण्यासाठी प्रविण मध्यस्थी करू शकणार नाही.
न्यायालयाने स्पष्ट केले की, जेव्हा एखादा बेकायदेशीर जमाव समान हेतूने गोळा होतो आणि त्या जमावाचा उद्देश खून करणे असतो. तेव्हा त्यातील प्रत्येक सदस्यावर संयुक्त जबाबदारी येते. त्यामुळे जमावातील प्रत्येक सदस्य त्या गुन्ह्यासाठी तितकाच जबाबदार धरला जातो. न्यायाधीशांनी सर्वोच न्यायालयाच्या विविध निकालांचे दाखले देत स्पष्ट केले की, या टप्प्यावर पुराव्यांचे पुन्हा सखोल पुनर्मूल्यांकन करणे शक्य नाही. प्रथमदर्शनी पुराव्यांवरून आरोपीचा या गुन्ह्यातील सहभाग स्पष्ट दिसून येतो. शिक्षेला स्थगिती देण्यास्तव कोणतेही ठोस कारण समोर आले नाही.असा कायदेशीर आधार घेत न्यायालयाने प्रतीक तोंडेचा जामीन व शिक्षा स्थगितीचा अर्ज फेटाळला. या प्रकरणातील मुख्य अपिलवर पुढील सुनावणी सुरू राहणार आहे.
