अकोला दिव्य न्यूज : समाजातील वंचित, दुर्बल व आर्थिकदृष्ट्या मागास घटकांतील महिलांना स्वावलंबी, सक्षम व रोजगाराभिमुख बनविण्याच्या उद्देशाने भारतरत्न डॉ. बाबासाहेब आंबेडकर यांच्या १३५ व्या जयंतीनिमित्त एक व्यापक व नाविन्य उपक्रम राबविण्यात येत आहे उपक्रमाचा ‘संकल्प’ मनपा गटनेते व नगरसेवक निलेश देव तसेच अँड. धनश्री देव स्मृती सेवा प्रकल्प यांच्या माध्यमातून करण्यात आला आहे. हा उपक्रम केवळ प्रशिक्षणापुरता मर्यादित नसून महिलांच्या सर्वांगीण सक्षमीकरणाच्या दिशेने एक ठोस पाऊल मानला जात आहे.
मागील वर्षी याअंतर्गत महिलांच्या आर्थिक सक्षमीकरण्याकरिता उल्लेखनीय कार्य करण्यात आले होते. विशेषतः, ११ गरजू महिलांना रोजगारनिर्मितीसाठी मोफत शिलाई मशीनचे वाटप करण्यात आले होते. या उपक्रमामुळे अनेक महिलांना स्वतःचा व्यवसाय सुरू करून स्वावलंबी होण्याची संधी मिळाली. त्या यशस्वी उपक्रमाचा पुढील टप्पा म्हणून यावर्षी अधिक सखोल व व्यापक स्वरूपात कौशल्य विकास कार्यक्रम राबविण्यात येत आहे.
आजच्या डिजिटल व स्पर्धात्मक युगात महिला १० वी, १२ वी तसेच पदवीधर असूनही संगणक व व्यावसायिक कौशल्यांच्या अभावामुळे नोकरीच्या संधींपासून वंचित राहतात. हे ओळखून महिलांना रोजगारक्षम कौशल्य प्रदान करण्यासाठी सर्टिफिकेट कोर्स इन टॅली विथ GST हा विशेष प्रशिक्षण कार्यक्रम आयोजित करण्यात आला आहे.
या कोर्सचा कालावधी ३ महिने असून प्रशिक्षणामध्ये सैद्धांतिक ज्ञानासोबतच प्रत्यक्ष कामावर आधारित (Practical) मार्गदर्शन दिले जाणार आहे. कोर्स पूर्ण केल्यानंतर MKCL, पुणे व YCMOU, नाशिक (यशवंतराव चव्हाण महाराष्ट्र मुक्त विद्यापीठ) यांचे संयुक्त प्रमाणपत्र देण्यात येणार आहे, ज्यामुळे प्रशिक्षणार्थींना विविध व्यावसायिक क्षेत्रात रोजगाराच्या संधी उपलब्ध होण्यास मदत होईल.
अकोला येथील प्रशिक्षण दि प्रोफेशनल या संस्थेत दिले जाईल. या उपक्रमाची वैशिष्ट्ये : महिलांसाठी पूर्णपणे मोफत प्रशिक्षण, अनुभवी मार्गदर्शकांकडून अध्यापन, प्रत्यक्ष कामावर आधारित प्रशिक्षण पद्धती, स्थानिक उद्योग, दुकाने व कार्यालयांमध्ये रोजगार संधी निर्माण करण्यावर भर, आर्थिकदृष्ट्या दुर्बल घटकांतील महिलांना प्राधान्य दिले जाईल.
१० वी, १२ वी उत्तीर्ण तसेच पदवीधर महिला या कोर्ससाठी अर्ज करू शकतात. हा उपक्रम विशेषतः नोकरीच्या शोधात असलेल्या व स्वतःच्या पायावर उभे राहण्याची इच्छा असलेल्या महिलांसाठी अत्यंत उपयुक्त ठरणार आहे. इच्छुक महिलांनी लवकरात लवकर खालील पत्त्यावर नोंदणी करावी. प्रवेश मर्यादित असून प्रथम येणाऱ्यास प्राधान्य दिले जाणार आहे.
नोंदणीसाठी अँड.धनश्री देव स्मृती सेवा प्रकल्प कार्यालय, पुष्कर अपार्टमेंट, सातव चौक, अकोला येथे संपर्क साधावा.या उपक्रमाच्या माध्यमातून डॉ. बाबासाहेब आंबेडकर यांच्या “शिका, संघटित व्हा आणि संघर्ष करा” या विचारांना प्रत्यक्ष कृतीत उतरवून नारीशक्तीला आत्मनिर्भर बनविण्याचा प्रयत्न असल्याचे आयोजकांनी सांगितले आहे.
