अकोला दिव्य न्यूज : सरत्या वर्षाला निरोप आणि नववर्षाच्या स्वागताच्या नावाखाली दरवर्षी होणारे हिडीस प्रदर्शनाऐवजी सभ्यता आणि संस्कृतीच्या माध्यमातून 12 वर्षांपुर्वी अकोल्यातील माहेश्वरी समाजातील नेतल-रामसा परिवाराने एक आदर्श पायंडा पाडला. आज एक तप उलटून गेले तरीही नववर्षाचे स्वागत भक्तीभावाने नामस्मरण,भजन करण्याचा हा पायंडा अव्याहतपणे सुरू आहे. अकोल्यातील भक्त मंडळी एकत्रितपणे ईश्वरनामात तल्लीन होत नवर्षाचं स्वागत करतात. दरवर्षीप्रमाणे यंदाही नेतल रामसा परिवारातर्फे मंगळवार ३१ डिसेंबरला’श्री.रामदेव बाबा जम्मा’चे आयोजन करण्यात आले आहे. माहेश्वरी भवन येथे मंगळवारी दुपारी १ वाजता जम्मा कार्यक्रमाची सुरूवात होणार आहे.
‘रामदेव बाबा जम्मा’ मध्ये रामदेव बाबांचा जन्म, विवाह व त्यांच्या आयुष्यातील महत्वाच्या प्रसंगांवर दृष्टीक्षेप टाकण्यासाठी वेशभूषा करुन ते प्रसंग जीवंतपणे साकारून रामदेवबाबांच्या जीवनाचा परिचय करून दिल्या जातो. युवापिढीला पाश्चिमात्य संस्कृतीपासून दुर ठेवण्यासाठी या आयोजनाचा भरपूर फायदा होतो आहे. दरवर्षी नवीन जम्मा गायकांना निमंत्रीत करण्यात येते. दरवर्षीप्रमाणे यंदाही मंगळवार ३१ डिसेंबरला जम्मा गायनासाठी जालना येथील सुप्रसिद्ध गायक शुभम व मनिष दायमाबंधूंना आमंत्रित करण्यात आले आहे. या कार्यक्रमाचा मोठ्या प्रमाणात लाभ घेण्याचे आवाहन नेतल-रामसा परिवारातर्फे भाविक भक्तांना करण्यात आले आहे.
सहज चर्चेतून नेतल रामसा परिवाराने या आदर्श संकल्पनेवर अंमलबजावणी केली. नववर्षाच्या पूर्वसंध्येला परिवारातील सदस्य, नातेवाईक, मित्रमंडळींना धांगडधिंगाना आणि हॉटेलिगपासून परावृत्त करण्यासाठी ‘रामदेव बाबा जम्मा’ आयोजनाची संकल्पना उदयास आली. ३१ डिसेंबर 2013 पासून या आगळ्यावेगळ्या आयोजनाला सुरूवात झाली. पहिल्याच वर्षी जवळपास २ हजार लोकांनी जम्मा श्रवण व महाप्रसादाचा आस्वाद घेतला. लोकांच्या प्रतिक्रिया व उत्स्फूर्त प्रतिसाद मिळाला आणि त्यानंतर दरवर्षी ३१ डिसेंबरला ‘रामदेव बाबा जम्मा’ आयोजनाचा पायंडा पडला आहे.
दरवर्षी ३० आणि ३१ डिसेंबरला विविध पारिवारीक स्पर्धा आणि विविध क्रीडा स्पर्धांचे आयोजन केल्या जाते. वर्षभरात शैक्षणिक व विविध क्षेत्रामध्ये उत्कृष्ट प्राविण्य मिळालेल्यांचा सत्कार करण्यात येतो. तर ३१ डिसेंबरला सकाळी २५ जोडप्यांच्या माध्यमातून अभिषेक करीत जम्मा कार्यक्रमाचं समापन होईस्तोवर होमहवन होत राहते.
गेल्या 12 वर्षांपासून हे आयोजन, नियोजनाचे एक आदर्श उदाहरण ठरले आहे. हा कार्यक्रम सर्वानुमते, सामूहिकपणे केला जातो. या आयोजनासाठी अध्यक्ष, उपाध्यक्ष किंवा कोणतीही कार्यकारिणी निवडली जात नाही. सामुहिक जबाबदारीतून संपुर्ण आयोजन यशस्वीरित्या पार पाडले जाते. एखाद्या सदस्याने नवीन संकल्पना चर्चेत आणल्यास ती संकल्पना सर्वानुमते पुर्णत्वास नेल्या जाते. यासोबतच करवा चौथ, तुलसी विवाह, मातृ-पितृ पूजन, बेलपत्र लाखोळी असे धार्मिक कार्यक्रम आयोजित करण्यात येतात. महत्त्वाचे म्हणजे भक्तांकडून प्राप्त दान-राशीतून विविध सामाजिक उपक्रम वर्षभर राबविण्यात येतात.
