अकोला दिव्य न्यूज : भारतीय आर्थिक उदारीकरणाचे जनक मानल्या जाणाऱ्या डॉ.मनमोहन सिंग यांचे योगदान सदैव स्मरणातच राहणार नाही तर जेव्हा जेव्हा देश आर्थिक संकटात सापडेल, तेव्हा डॉ मनमोहनसिंग यांनी केलेल्या उपाययोजना मार्गदर्शक होऊन मदतीला धावून येईल.जागतिक किर्तीचे नेते होऊन देखील आपले पाय शेवटच्या क्षणापर्यंत जमीनवरच राखणारे डॉ.मनमोहन सिंग यांचा जीवनप्रवास खरोखरच कौतुकास्पद आणि प्रेरणादायी असून आता उरल्या फक्त आठवणी आणि किस्से !
माजी पंतप्रधान डॉ मनमोहनसिंग यांच्या अखेरच्या प्रवासाला आज शनिवार 28 डिसेंबरला सकाळी काँग्रेस मुख्यालयातून सुरुवात झाली.
त्यांच्या अखेरच्या प्रवासात मोठी गर्दी पाहायला मिळाली. त्यांच्या शेवटच्या दर्शनासाठी हजारो लोक साश्रु नयनांनी जमले होते. काँग्रेस नेते राहुल गांधी मृतदेहासोबत लष्कराच्या वाहनात बसलेले दिसले. त्यांचे दु:ख आणि आदर स्पष्ट दिसत होता.
डॉ.मनमोहन सिंग यांच्या अंत्यसंस्काराला देश-विदेशातील अनेक दिग्गज नेते उपस्थित होते. अंत्यसंस्कारात सहभागी झालेल्या पाहुण्यांमध्ये भारताच्या राष्ट्रपती द्रौपदी मुर्मू, उपराष्ट्रपती जगदीप धनखर, पंतप्रधान नरेंद्र मोदी, गृहमंत्री अमित शाह, संरक्षण मंत्री राजनाथ सिंह, लोकसभा अध्यक्ष ओम बिर्ला, विरोधी पक्षनेते आणि इतर अनेक नेते उपस्थित होते.
परदेशी पाहुण्यांमध्ये भूतानचे राजा आणि मॉरिशसचे परराष्ट्र मंत्री यांनीही उपस्थिती दर्शवली. यावरून असे दिसून येते की डॉ. मनमोहन सिंग यांचा प्रभाव केवळ भारतापुरता मर्यादित नव्हता तर आंतरराष्ट्रीय स्तरावरही त्यांचा आदर होता.
सिंगापूरनेही शोक व्यक्त करण्यासाठी आपला ध्वज अर्ध्यावर उतरवला. सिंगापूरमधील भारताचे उच्चायुक्त सायमन वँग यांनी माजी पंतप्रधानांच्या निधनाबद्दल तीव्र शोक व्यक्त केला.
त्यांनी २००४ ते २०१४ पर्यंत पंतप्रधान म्हणून देशाची सेवा केली. शांत, नम्र आणि दूरदृष्टीचे व्यक्तिमत्त्व असलेल्या डॉ. सिंग यांनी भारताच्या अर्थव्यवस्थेत, शिक्षणात आणि समाजकल्याणात अमूल्य योगदान दिले आहे. डॉ. सिंग यांचे निधन हे भारताचे कधीही भरून न येणारे नुकसान आहे. त्यांचे योगदान देश सदैव लक्षात ठेवेल आणि त्यांनी दाखवलेल्या मार्गावर पुढे जाईल.
