अकोला दिव्य ऑनलाईन : राज्यात विधानसभा निवडणुकीची मोर्चेबांधणी सुरू असून, अकोला लोकसभा मतदारसंघातील बाळापूर विधानसभा मतदारसंघ हा शिवसेनेसाठी अत्यंत पोषक आहे. महायुतीत हा मतदारसंघ शिवसेनेचा हक्काचा व हमखास विजय मिळवून देणारा मतदारसंघ असल्याची भावना मतदारांसह शिवसैनिकांची असून, यासाठी शिवसैनिकांसह मित्र पक्षांची सहमती व ओबीसी समाजात प्राबल्य असलेले रामेश्वर पवळ हेच एकमेव सर्वसमावेशक उमेदवार आहेतः तेव्हा पवळ यांनाच उमेदवारी देऊन बाळापूरात भगवा फडकावावा, अशा आशयाचे निवेदन शेकडो शिवसैनिकांनी पक्षनेते व मुख्यमंत्री एकनाथ शिंदे यांना दिले आहे.
अकोला लोकसभा मतदारसंघात अकोला पुर्व, अकोला पश्चिम, मूर्तिजापूर, अकोट व बाळापूर असे पाच विधानसभा मतदारसंघ असून बाळापूर हा मतदारसंघ युतीमध्ये शिवसेनेकडे आहे. गेल्या विधानसभा निवडणुकीत युतीमध्ये शिवसेनेचा उमेदवार ३५.४८ टक्के मते घेऊन तिरंगी लढतीमध्ये विजयी झाला. आता महायुतीत राष्ट्रवादीचा देखील समावेश झाल्याने बाळापूर मतदारसंघात ४३.९२ टक्के जनमत शिवसेनेकडे तयार झाले आहे. सध्याचे ठाकरे गटाचे आमदार नितीन देशमुख यांनी दगाफटका केल्याचे उभ्या महाराष्ट्राने पाहिले. त्यामुळे आगामी निवडणुकीत देशमुखांना पक्षाकडून धडा शिकवला पाहिजे. त्यांना प्रतिस्पर्धी म्हणून महायुतीकडून प्राबल्य असलेला उमेदवार देणे गरजेचे आहे. पक्षातर्फे राज्य समन्वयक रामेश्वर पवळ हे तुल्यबळ सामन्यात शिवसेनेचा भगवा झेंडा बाळापूर मतदारसंघात फडकविण्यात सक्षम आहेत.
जातीय समीकरणांतही बाळापूर मतदारसंघात सुमारे १८ टक्के एससी, ५ टक्के एसटी, माळी ८ टक्के तर २० टक्के मुस्लीम मतदार आहे. ओबीसी, मराठा समाजाचे मतदारही मोठया संख्येने आहेत. रामेश्वर पवळ यांच्या वंजारी समाजाची देखील सुमारे १० हजार निर्णायक मतदार असून रामेश्वर पवळ हे वंजारी समाज नेते आहेत. या माध्यमातून हा समाजही राज्यात पक्षाशी जोडणे शक्य होईल. ग्रामीण विकास हा शिवसेनेचा अजेंडा असल्याने मतदार निश्चितच शिवसेनेला बळ देतील.असं मतदारसंघाचा कानोसा घेतला असता, दिसून येते.
तब्बल दोन दशक जेष्ठ नेते शरद पवारांसोबत निष्ठेने राष्ट्रवादी काँग्रेसमध्ये अनेक महत्वाच्या पदावर कार्यरत असताना विधानपरिषद, राज्य महामंडळावर नियुक्तीच्या अनुषंगाने अनेकदा पवळ यांचे नाव झळकले. परंतु अंतर्गत प्रक्रियेत ही संधी त्यांना मिळू शकली नाही. तर भविष्यासाठी शिवेसेनेशी जुळले. दोन वर्षापासून संपूर्ण राज्यात त्यांचे सक्षम कार्य सुरू आहे. बुलडाणा लोकसभा निवडणुकीतील पक्षाच्या यशात रामेश्वर पवळ यांची भूमिका महत्वाची ठरली. पक्षाचा प्रवास अधिक व्यापक होण्यासाठी बाळापूर मतदारसंघातून पवळ यांना उमेदवारी दिल्यास विदर्भातील ओबीसी समाज पक्षाशी निश्चितच जोडला जाईल. याबाबत पदाधिकारी व शिवसैनिकांनी पत्र देऊन पवळ यांना उमेदवारी द्यावी.अशी आग्रही मागणी केली असून पवळ यांच्यावर विश्वास दाखवाल, असा ठाम विश्वास आहे. असं निवेदन निवासी उपजिल्हाप्रमुख योगेश बुंदेले आणि शिवसेना पदाधिकारी व शेकडो शिवसैनिकांनी दिले आहे.
